Nga kampi i refugjatëve në “Eurovision”, historia e përfaqësuesit të Suedisë në festivalin europian të këngës

Për Tusse, këngëtarin që do të përfaqësojë Suedinë në ‘Eurovision’, ardhja në vendin nordik ishte si të hyje në një botë të re.

19-vjeçari, i lindur në Republikën Demokratike të Kongos, u nda nga prindërit e tij kur ishte vetëm 5 vjeç, në përpjekje për t’u arratisur nga vendi i përçarë nga lufta. Ai jetoi 3 vite në një kamp refugjatësh në Uganda, përpara se t’i jepej azil në Suedi.

“Është një botë krejt tjetër. Është një jetë që nuk do t’ia uroja askujt, sepse mërzitesh shumë çdo ditë dhe pyet veten: a do të kem ushqim sot? A do të gjejmë ujë, a do të jemi gjallë nesër?” thotë Tusse për Reuters.

Gjatë gjithë fëmijërisë së tij në Afrikë, Tusse ka kënduar në koret e kishave, pasion të cilin e vijoi edhe në Suedi, ku u bë pjesë e koreve vendase. Rrjedhimisht, ai mori pjesë edhe në konkurset e talenteve siç ishte “Swedish Idol”, ku ai arriti të shpallej fitues.

Tani, Tusse do të përfaqësojë Suedinë me këngën me titull “Voices”.

Festivali i këngës ‘Eurovision’, një prej evenimenteve më të mëdha të televizionit, do të zhvillohet në Rotterdam nga data 18 maj deri në 22, pas fitores së Holandës në 2019 me këngën “Arcade”.

Pas anulimit të festivalit të vitit të shkuar për shkak të pandemisë, eventi i këtij viti do të zhvillohet në prezencën e audiencës së kufizuar.