Ngrihet një tjetër komision hetimor për sulmin ndaj “Capitol Hill” në SHBA

Kryetarja e Dhomës së Përfaqësuesve të Shteteve të Bashkuara, Nancy Pelosi njoftoi të enjten ngritjen e një komisioni të ri që do të hetojë sulmin e 6 janarit ndaj Capitol Hill, pasi në maj senatorët republikanë bllokuan krijimin e një komisioni të pavarur për të hetuar ngjarjen.

Duke folur në një konferencë shtypi, Pelosi refuzoi të përmendte data për jetëgjatësinë e panelit hetimor, por tha se ai do të ekzistojë për aq kohë sa do të jetë e nevojshme.

Ajo nuk dha as emrat e ligjvënësve që do të përbëjnë komisionin, por bëri të qartë se pret që të dyja partitë të emërojnë përfaqësuesit e tyre, duke shpresuar se lideri i grupit republikan në Kongres, Kevin McCarthy do të caktojë “njerëz të përgjegjshëm”.

“Sot, me një solemnitet të madh, por edhe trishtim, po njoftoj se Kongresi do të caktojë një komision të ri për kryengritjen e 6 janarit. E përsëris se ajo ishte ndër ditët më të errëta të historisë së kombit tonë. Ndaj është thelbësore që të zbardhim të vërtetën e asaj ngjarjeje dhe të sigurohemi që një sulm i tillë të mos përsëritet”, u shpreh Nancy Pelosi, kryetare e Dhomës së Përfaqësuesve në SHBA.

Qindra mbështetës të presidentit të atëhershëm, Donald Trump, bastisën ndërtesën e Capitol më 6 janar, në përpjekje për të penguar Kongresin të certifikonte fitoren e Joe Biden në zgjedhjet presidenciale të 3 nëntorit.

Aktet e dhunës lanë pas 5 të vdekur, përfshirë një oficer policie dhe që prej atëherë janë arrestuar mbi 480 persona nën akuzën e pjesëmarrjes në sulm.

LEXONI GJITHASHTU:

• Shembet ndërtesa 12-katëshe në Florida, një i vdekur dhe 50 të humbur
• Dhunë, kërcënime dhe pushime të mohuara: Si ndikoi pandemia në zinxhirin e prodhimit në vitin 2020
• Frika nga varianti Delta, ekspertët e BE kërkojnë ritme më të shpejta vaksinimi