Nobeli për Paqen, çmimi i akordohet Programit Botëror të Ushqimit

Çmimi Nobel për Paqe këtë vit i akordohet Programit Botëror të Ushqimit, pjesë e Kombeve të Bashkuara, me motivacionin për përpjekjet e tij për të luftuar urinë.

Ndër motivacionet Komiteti Norvegjez vlerësoi se kjo organizatë ka kontribuar për të sjellë paqe në zonat e konfliktit dhe ka vepruar si një forcë aktive për të parandaluar që uria të përdoret si një armë në luftëra apo konflikte.

“Nevoja për solidaritet ndërkombëtar dhe bashkëpunim shumëpalësh është më e dukshme se kurrë, ”u shpreh kryetarja  e Komitetit Norvegjez, Andersen gjatë konferencës për mediat.

Çmimi është me vlerë 1,1 milionë dollarë dhe do të akordohet në Oslo, më 10 dhjetor.

Vitin e kaluar, presidenti etiopian mori çmimin Nobel për Paqe  për përpjekjet e tij për t’i dhënë fund një konflikti dydekadaësh me Eritrenë fqinje.

Gjatë kësaj jave u akorduan edhe të tjera çmime, përfshirë çmimin në letërsi, fizikë, kimi, mjekësi ndërsa pritet të jepet edhe çmimi në shkencat ekonomike.