OKB e alarmuar nga ndryshimet e klimës: Vitin e kaluar u thyen rekordet

Organizata Meteorologjike Botërore, në raportin e saj “Gjendja globale e klimës 2021”, paralajmëron se sistemi energjetik global po e çon njerëzimin drejt katastrofës.

Dokumenti thotë se katër faktorët kryesorë të ndryshimit të klimës thyen rekorde të reja vitin e kaluar, duke iu referuar gazit serrë, rritjes së nivelit të deteve, temperaturave dhe acidifikimit të oqeaneve.

“Vitet nga 2015-a në 2021 ishin më të ngrohtat. Në 2021-shin kemi thyer 4 rekorde; ngrohja e oqeaneve, CO2-shi në atmosferë, acidifikimi i oqeaneve dhe nivelet e deteve”, thotë Peeteri Taalas, nga Organizata Meteorologjike Botërore

Për sekretarin e përgjithshëm të OKB-së, Antonio Guterres, raporti është një tregues i dhimbshëm i dështimit të njerëzimit për të luftuar ndryshimet e klimës.

“Nëse veprojmë së bashku, kalimi në energjinë e rinovueshme do të jetë projekti i paqes i shekullit XXI. Çdo vend, qytet dhe qytetar, çdo institucion financiar, kompani dhe organizata të shoqërisë civile kanë rolin e tyre. Por mbi të gjitha është koha që liderët politikë dhe biznesmenët të mos flasin më për këtë energji si një projekt të largët. Sepse pa energji alternative nuk ka të ardhme. Raporti e bën të qartë, është koha të veprojmë para se të jetë tepër vonë”, shprehet Antonio Guterres, sekretar i përgjithshëm i OKB-së.

Organizata Meteorologjike Botërore deklaroi më tej se, aktivitetet e njeriut po shkaktojnë ndryshimet në shkallë planetare; në tokë, oqeane dhe atmosferë, me degëzime të dëmshme për ekosistemin.

LEXONI GJITHASHTU:

• Ndryshimet klimatike do t’i bëjnë ciklonet më të shpeshta deri në vitin 2050
• OKB: Lufta në Ukrainë kërcënon vendet e varfra