Opozita ruse proteston kundër masave të qeverisë ndaj medias

Kandidatët e opozitës ruse mbajtën një protestë në Moskë kundër ligjit që i etiketon organizatat mediatike si “agjentë të huaj”, kur mungojnë më pak se dy javë nga zgjedhjet parlamentare.

Etiketimi aplikohet për organizatat të cilat autoriteti shtetëror mbikëqyrës i akuzon se marrin fonde nga jashtë, por lëvizja shihet si një akt ndëshkimi ndaj medias opozitare.

Pasi përcaktohen si të tilla, organizatat mediatike detyrohen ta cilësojnë përmbajtjen e tyre në Rusi si të prodhuar nga një “agjent i huaj”, duke detyruar disa kompani të tërheqin fondet e tyre për reklama.

“Autoritetet tona duan ta asgjësojnë komplet sferën mediatike”, deklaroi kandidati i opozitës Nikola Kavkazsky, duke e cilësuar lëvizjen e qeverisë si “Orwellian-e”.

Etiketimi u aplikua muajin e kaluar ndaj transmetuesit televiziv online “Dozhd”, që ka qenë një zë kritik i autoriteteve dhe më herët ndaj faqes së internetit “Meduza”, me bazë në Riga.

Kritikët e shohin këtë masë si një formë presioni ndaj medias së lirë, përpara zgjedhjeve parlamentare që mbahen më 17 shtator.

Për shkak të kufizimeve për protestat të vendosura që nga koha e pandemisë, tubimi u cilësua zyrtarisht si një takim mes kandidatëve për deputetë dhe votuesve.

LEXONI GJITHASHTU:

• Rusia shpall 3 OJQ gjermane si të padëshirueshme
• Rusia paralajmëron Disney për shpërndarjen e filmave të shkurtër me karakter homoseksual