Orban fiton mandatin e katërt si kryeministër i Hungarisë, kritika Zelenskit

Viktor Orban siguroi një mandat të katërt radhazi në krye të qeverisë hungareze duke mbyllur një fushatë të dominuar nga qëndrimi i tij i diskutueshëm ndaj pushtimit rus të Ukrainës.

Fjalimi i tij i fitores kishte edhe tone kritikash ndaj Volodimir Zelenskit, liderit ukrainas i cili e ka sfiduar vazhdimisht Orbani për mosgatishmërinë për të dënuar aleatin e tij të ngushtë Vladimir Putin për pushtimin e Ukrainës.

“Na duhej të luftonim me forcat më të mëdha, me të majtën në vend, me të majtën ndërkombëtare, me burokratët e Brukselit, me të gjitha organizatat e perandorisë Soros, me mediat kryesore ndërkombëtare dhe në fund me presidentin ukrainas, kurrë nuk ka pasur kaq shumë kundërshtarë”, tha Orban.

Gara pritej të ishte më e ngushtë që kur Orban mori pushtetin në vitin 2010, pasi gjashtë partitw kryesore opozitare të Hungarisë lanë mënjanë dallimet e tyre ideologjike për të formuar një front të bashkuar kundër Fidesz.

Por Péter Marki-Zay, i cili ka qenë në krye të grupit opozitar ‘Të Bashkuar për Hungarinë’, nuk e fitoi as qarkun e tij.

Partia e Orbanit ka forcuar pushtetin përmes një strukture të favorshme të pronësisë mbi median dhe ndryshimeve në sistemin elektoral që kritikët thonë se i bën zgjedhjet të padrejta. Koalicioni i Votës së Pastër, një grup prej katër OJQ hungareze, tha se kishte marrë ankesa të shumta për parregullsi.

LEXONI GJITHASHTU:

• Orban shpërfill BE-në: Do rrisim furnizimet me gaz rus
• Orban: Bashkimi Evropian nuk na detyron të ndryshojmë ligjet