Orban kundër anëtarësimit të Ukrainës në BE: Deklaratë lufte

Viktor Orban ka kritikuar ashpër planin e BE-së për pranimin e shpejtë të Ukrainës , duke e quajtur atë një “deklaratë lufte” kundër Hungarisë.

Komisioni Evropian po punon mbi një plan për të përshpejtuar procesin e pranimit të Kievit, i cili mund t’i ofrojë vendit anëtarësim të pjesshëm në BE përpara se të përfundojë reformat e kërkuara.

Presidenti ukrainas Volodymyr Zelensky po bën presion për anëtarësim nga viti 2027, si pjesë e çdo marrëveshjeje paqeje me Rusinë.

“Plani i fundit i luftës Bruksel-Kiev”

Orban, një aleat i ngushtë i Moskës, kundërshton fuqimisht anëtarësimin e Ukrainës në BE.

Sipas diplomatëve dhe zyrtarëve evropianë që folën me Politico, Komisioni Evropian po shqyrton mënyra për të anashkaluar një veto të mundshme hungareze, siç është t’i kërkohet Presidentit të SHBA-së Donald Trump të ushtrojë presion mbi Orbanin ose edhe të shqyrtojë aktivizimin e Nenit 7 të Traktatit të BE-së, gjë që mund të çojë në pezullimin e të drejtave të votës së Budapestit.

Një veprim i tillë do të përbënte “një deklaratë të hapur lufte kundër Hungarisë”, paralajmëroi kryeministri hungarez sot, të mërkurën, në një postim në platformën X.

Orban foli për ” planin e fundit të luftës së Brukselit dhe Kievit “.

“Ata kanë vendosur që Ukraina do të pranohet në Bashkim që në vitin 2027”, shtoi ai. “Ata e injorojnë vendimin e popullit hungarez dhe janë të vendosur ta rrëzojnë qeverinë hungareze me çdo mjet”, shtoi ai.