Organizata e ish-presidentit Trump është nën hetim, dorëzohet financieri Weisselberg

Financieri i Organizatës Trump, Allen Weisselberg u dorëzua të enjten tek autoritetet, pasi ai dhe grupi i ish-presidentit amerikan po bëhen gati për t’u përballur me drejtësinë në kuadër të një hetimi penal.

Weisselberg, që ndihmoi në menaxhimin e pronave të Trump gjatë presidencës së tij, hyri vullnetarisht në ndërtesën ku ndodhet gjykata penale e Manhatanit.

Ai dhe Organizata Trump do të gjykohen më vonë gjatë ditës, ka deklaruar një person i afërt me çështjen për agjencinë e lajmeve “Reuters”.

Për momentin nuk dihen ende me saktësi akuzat e ngritura nga prokurori Cyrus Vance, i cili në këtë proces ka bashkëpunuar me hetuesit e zyrës së prokurores së përgjithshme të Nju Jorkut, Letitia James.

Padia ndaj Organizatës Trump mund të minojë marrëdhëniet e kompanisë me bankat dhe partnerët në biznes, si dhe të komplikojë të ardhmen politike të Trump, teksa ai planifikon të rikandidojë për president në 2024-n.

Në një deklaratë, organizata akuzoi prokurorin e çështjes se po përdor kryefinancierin Weisselberg, që ka punuar për familjen Trump për 48 vjet, si një mjet për të dëmtuar figurën e ish-presidentit.

“Kjo nuk është drejtësi, kjo është politikë”, tha kompania.

Vetë Trump nuk pritet të akuzohet, edhe pse prokurorët kanë deklaruar se hetimi ndaj kompanisë së tij vazhdon.

LEXONI GJITHASHTU:

• Rikthehet Donald Trump: Zgjedhjet i kemi fituar 2 herë, do të fitojmë sërish
• ‘Mashtroi për zgjedhjet’, ish-avokatit të Trump i pezullohet licenca e avokatisë
• E ardhmja e NATO-s, pas Trump, Aleanca kërkon marrëdhënie të re me Biden