OSBE: Zgjedhjet në SHBA u “njollosën” nga përpjekjet për të cenuar besimin e popullit

5 Nëntor 2020 | 13:41

Zgjedhjet në SHBA janë njollosur nga përpjekjet për të cenuar besimin e popullit tek procesi elektoral, thonë mbikëqyrësit e zgjedhjeve nga Organizata për Siguri dhe Bashkëpunimin në Europë (OSBE).

OSBE tha se mbikëqyrësit e zgjedhjeve të SHBA-së “ia kanë dalë të menaxhojnë situatën pavarësisht vështirësive që ka sjellë pandemia COVID-19”.

Misioni ndërkombëtar shtoi se “fushata ishte e karakterizuar nga një polarizim i thellë politik që shpesh ka mbizotëruar mbi debatin për politikat publike dhe akuzave të paqena për mashtrime sistematike”.

Michael Georg Link, lideri i misionit afat-shkurtër të OSBE, tha se akuzat e presidentit Donald Trump “dëmtojnë besimin e popullit tek institucionet e demokracisë”.

Trump u përpoq të hedhë hije dyshimi mbi rezultatet e votave që ishin ende në numërim gjatë së mërkurës, duke akuzuar shtetet se po i “zhduknin votat fshehurazi”.

Komisionerja Elektorale e Uiskonsin, Meagan Wolfe nga ana tjetër tha se zyrtarët elektoralë kanë punuar me “shpirt e zemër” gjatë këtyre ditëve.

Wolfe tha se “ndihet e sigurt që çdo votë e vlefshme është numëruar në shtetin e Uiskonsin”.

“Mendoj se duhet të jemi shumë krenar për mënyrën sesi u zhvillua procesi i djeshëm”.

Biden fitoi në Uiskonsin me një avantazh prej rreth 20.500 votash.

OSBE tha se pandemia ka sjellë vështirësitë e veta por se dita e zgjedhjeve ka kaluar qetësisht.

Sipas tyre, disa dokumente specifike identifikimi kanë ndikuar tek disa grupe të shoqërisë dhe se financat e fushatës mbeten problem në SHBA.  

Shpenzimet totale të këtyre zgjedhjeve mendohet se kanë kapur shifrën 14 miliardë dollarë, tha OSBE.

 

Lexoni gjithashtu

Home Kryefaqja
Shiko në: YouTube
Lajme të Sugjeruara