OTP Bank Albania nderohet me çmimin “Banka më e Mirë” në Shqipëri nga Euromoney Awards for Excellence 2021

Ky është viti i dytë radhazi që Banka OTP Albania njihet si “Banka më e Mirë” në Shqipëri prej Euromoney, gjatë ndarjes se Çmimeve të Ekselencës 2021.

Mes arritjeve kryesore mbi të cilat u bazua edhe vlerësimi i dhënë nga Euromoney, qëndronin puna e jashtëzakonshme gjatë krizës së COVID-19 dhe daljes mbanë me arritje fantastike si për rritjen e qëndrueshme dhe për përfitueshmërinë që është më e larta në vend, po aq edhe për përkushtimin në zhvillimet digjitale të bankës.

“Të fitosh këtë çmim është një arritje motivuese për ne, e cila dëshmon se përkushtimi i skuadrës për të realizuar objektivat e vendosur është shpërblyer, sidomos duke pasur parasysh rrethanat e vështira të vitit 2020. Strategjia e bankës sonë dhe e grupit në tërësi, që të konkurrojmë për të qenë të parët dhe më të mirët në treg, edhe një herë u shpërblye nëpërmjet këtyre çmimeve prestigjioze. Ne duhet të ndihemi krenarë që Banka OTP Albania vijoi të ekzekutojë me sukses këtë strategji fituese duke e rritur peshën e saj në tregun bankar shqiptar pavarësisht vështirësive që na diktoi realiteti.”  u shpreh CEO i OTP Bank Albania, z. Bledar Shella.

Fituesit shpallen pas një vlerësimi tërësor nga ekspertët, bazuar në monitorimin vjetor të  bankingut global dhe industrive të bankingut të investimeve.