Papa Françesk në gjendje të stabilizuar pas operacionit

Papa Françesk ndodhet në gjendje të stabilizuar shëndetësore, pas operacionit që iu nënshtrua të dielën në mbrëmje në një spital në Romë.

Në një deklaratë të dielën vonë, zëdhënësi i Selisë së Shenjtë, Matteo Bruni, tha se 84-vjeçari iu nënshtrua operacionit pas ngushtimit të zorrës të trashë.

Z. Bruni nuk tregoi sa zgjati operacioni, por tha se Papa iu nënshtrua një anestezie të përgjithshme.

Papa u shtrua në spital për operacionin e planifikuar vetëm disa orë pasi përshëndeti publikun në sheshin e “Shën Pjetrit”, ku deklaroi se në shtator do të shkojë në Hungari dhe Sllovaki.

Ky është trajtimi i parë mjekësor i bërë publik nga Selia e Shenjtë për Papën, që kur ai u zgjodh në këtë detyrë në vitin 2013.

LEXONI GJITHASHTU:

• “Kushte ekonomike të rinjve për të stimuluar lindjet”, Papa Françesku i bën thirrje shtetit italian
• Lutje për fundin e pandemisë, Papa Françesku: Paratë për armatime, çojini për kërkime shkencore
• Vigjilja e Pashkës katolike, Papa Françesku bën thirrje për shpresë pavarësisht pandemisë