Parashikimi i OBSH-së, shumë shpejt 10 milionë të infektuar me COVID-19 në botë

Organizata Botërore e Shëndetësisë (OBSH) bën me dije se shumë shpejt numri i të infektuarve me Covid-19 mund të kapë shifrën e 10 milionë personave.

Ndërkaq në Nju Jork të Shteteve të Bashkuara të Amerikës kërkohet karantinë e detyrueshme për udhëtarët që vijnë nga shtetet më të prekura.

Në nivel global është rikthyer frika e një vale të dytë të pandemisë pavarësisht përpjekjeve për të bashkëjetuar me virusin. Amerika Latine mbetet  një nga kontinentet më të prekura nga COVID-19 me më shumë se 100.000 viktima, gjysma e të cilëve regjistrohen në Brazil.

E pavarësisht kësaj situate Presidenti Jair Bolsonaro vijon të flasë për një kërcënim në largim dhe të injorojë masat e ndërmarra për të parandaluar përhapjen e infeksionit.

Por vetëm 24 orë pasi një gjykatës e detyroi të mbante maskë në publik, presidenti u shfaq duke e mbajtur një të tillë.

Numri i rasteve me të infektuar në të gjithë botën pritet të arrijë një tjetër pikë kulmore. Të paktën kështu bën me dije OBSH.

“Në muajin e parë të përhapjes  më pak se 10,000 raste u raportuan në OBSH. Në muajt e fundit,  janë raportuar pothuajse 4 milion raste Ne presim që brenda javës tjetër  të kemi në total 10 milion të infektuar,” është shprehur Tedros Adhanom Ghebreyesus.

Në Indi, pandemia  ende nuk ka arritur kulmin e saj.  Në 24 orët e fundit janë regjistruar 16,000 të infektuar të tjerë – niveli më i lartë ditor i rasteve të reja të koronavirusit që kur u shpall zyrtarisht pandemia.

Në Nju Delhi, qeveria ka kërkuar ndihmën e ushtrisë për të menaxhuar situatën.

Zëvendësministri i rajonit tha se përparësi ishte zbatimi i politikave dhe lehtësirave që zvogëlojnë vuajtjet e personave të infektuar, por pa shkaktuar kaos.

Ndërkohë edhe në SHBA ka një rishfaqje të koronavirusit në shtetet jugore dhe perëndimore.

Në këto kushte Nju Jorku, dikur epiqendra e virusit kërkon që të gjithë udhëtarët që vijnë nga 8 shtete amerikane të vihen për 14 ditë në karantinë të detyrueshme.

“Nëse thyhet karantina, do të ndiqeni penalisht dhe do të futeni në karantinë me detyrim . Ndoshta do të duhet të paguani kostos e karantinës,” – tha guvernatori i Nju Jorkut Andrew Cuomo.

Edhe në Pekin ku janë ende duke u përballur me një valë të dytë të Covid-19, njerëzve që janë në rrezik u ndalohet të largohen nga qyteti gjatë festës tre-ditore të Festivalit të Barkave të Dragoit që nis të enjten.

Lexoni gjithashtu:

Tjetër lloj vaksine anti-COVID-19 nis të testohet te njerëzit në Britani

Frikë nga vala e dytë. Britani, ekspertët thirrje qeverisë

I nxehti pushton Evropën. Nga Spanja në Suedi, temperatura rekord

Kroacia rikthen karantinën, 14 ditë izolim për udhëtarët nga Serbia, Kosova, RMV dhe Bosnje e Hercegovina