Paris, sulm terrorist pranë zyrave të “Charlie Hebdo”; dy të plagosur

Të paktën dy persona mbetën të plagosur me armë të ftohtë ditën e premte në Paris, në afërsi të zyrave të revistës satirike “Charlie Hebdo”, që 5 vjet më parë u sulmua nga militantët islamikë.

Autoritetet vendase e kanë klasifikuar episodin si një sulm terrorist. Policia pariziene deklaroi se një person u arrestua lidhur me sulmin dhe shtoi se bëhet fjalë për një 18-vjeçar, i njohur për shërbimet e sigurisë. Gjithashtu, mediat franceze bëjnë me dije se një tjetër person është ndaluar.

Ndërkohë, në vendin e ngjarjes u gjet një hanxhar, me të cilin dyshohet të jenë kryer sulmet.

Hetimet janë marrë në dorë nga Drejtoria Kombëtare e Antiterrorit, që ka sqaruar dhe arsyet përse.

“Së pari, vendngjarja e këtij sulmi është përballë ndërtesës ku dikur ndodheshin zyrat e “Charlie Hebdo”. Së dyti, momenti kur ky episod ka ndodhur, që përkon me gjyqin ndaj të dyshuarve për sulmet e janarit 2015. Dhe së treti, mënyra sa si rrodhi incidenti, me dëshirën e agresorit për të vënë në rrezik jetët e dy njerëzve që po shihnin punën e tyre”, deklaroi Jean Francois Ricard, prokuror i Antiterrorit.

Për fat të mirë, asnjë nga të lënduarit nuk është në rrezik për jetën. Kryeministri francez Jean Castex vizitoi gjithashtu vendin e ngjarjes dhe saktësoi se të plagosurit janë dy gazetarë që po konsumonin nga një cigare në kohën e pushimit.

“Autoritetet e sigurisë, të cilat i falënderoj, reaguan shumë shpejt për të bërë detyrën e tyre në këto rrethana. Ngjarja u verifikua në një vend simbolik dhe në të njëjtën kohë kur gjyqi ndaj atyre që përgatitën sulmin ndaj “Charlie Hebdo” po zhvillohet”, deklaroi Castex.

Ministri i Brendshëm Gerald Darmanin dhe kryebashkiakja e Parisit, Anne Hidalgo vizituan gjithashtu vendin e ngjarjes.