Parku Natyror i Vjosës monitorohet nga ekspertët vendas dhe të huaj

Pas shpalljes Park Kombëtar të lumit Vjosa dhe degëve të saj, ekspertët e mjedisit vendas dhe të huaj vazhdojnë përpjekjet për planifikimin e luginës së Vjosës, mbrojtjen e vlerave natyrore në shërbim të zhvillimit të qëndrueshëm.

Një grup ekspertësh duke përfshirë edhe ata ndërkombëtarë po punojnë për hartimin e Planit të Menaxhimit, Masterplanit për Turizmin dhe një sërë dokumentesh të tjera për të vendosur në funksion Parkun e Vjosës. Rëndësi i kushtohet konsultimeve me komunitetin e zonave të Jugut për mbrojtjen e biodiversitetit të lumit, të fundit të egër në Europë dhe resurseve që mbart për zhvillimin e ekoturiznmit.

“Interesi është i lartë për ta zhvilluar luginën e Vjosës, interesi është i lartë edhe për ta ruajtur atë  dhe besoj me shumë projekte që do të vijnë, do të ketë zhvillim infrastrukturor, do të ketë zhvillim të turizmit,  por është shumë e rëndësishme të përmend këtu të turizmit natyror,  pra një ekoturizëm dhe një turizëm i qëndrueshëm,  i cili do ti sillte të ardhura banorëve të zonës për një kohë më të gjatë”, pohoi Besiana Guri, eksperte mjedisi

“Mendoj se Vjosa është një lumë unik për territorin e Shqipërisë, Europën  dhe botën sepse  është një nga lumenjtë e fundit  të egër që ne kemi  në këtë pjesë të botës. Këtu në Gjirokastër është shumë i veçantë si shkak i gërshetimit të trashëgimisë kulturore si vlerë e UNESCO-s dhe pasurisë së këtij lumi fantastic. Pra janë mundësi të shkëlqyera  për të mbrojtur Parkun e Vjosës në shërbim të zhvillimit të zones”, u shpreh Andrej Sovine, ekspert ndërkombëtar i mjedisit

“Detyrimisht  duhet marrë mendimi i komunitetit për vazhdimin  e mëtejshëm të hapave  si kryesisht në hartimin e Planit të Menaxhimit, zgjerimin e parkut dhe financimin, monitorimin  dhe menaxhimin e tij në mënyrë që ky park të ruajë vlerat e tij  si parku më i egër në Europë, si parku  më i virgjër dhe si parku  më atraktiv që  do të kemi në Shqipëri”, u shpreh Grigor Dushi, Drejtor i Agjencisë së Zonave të Mbrojtura, Gjirokastër

Lumi Vjosa ka një gjatësi prej 270 km ndërsa degët e saj përshkojnë zonat e Përmetit, Gjirokastrës,Tepelenës, etj duke përbërë një resurs të rëndësishëm për zhvillimin e ekonomive lokale të tyre dhe veçanërisht të turizmit.

LEXONI GJITHASHTU: 

• Kush e formon qeverinë e re në Mal të Zi? Gazetari Dukaj zbulon skenarët
• Eksperti i sigurisë: Erdogan i sëmurë me kancer, ja kush e zëvendëson