Parlamenti i Venezuelës miraton ligjin për lirimin e të burgosurve politikë

Parlamenti i Venezuelës miratoi unanimisht të enjten një ligj për amnisti, i cili pritet të lejojë lirimin e të burgosurve që opozita dhe organizatat joqeveritare i përshkruajnë si politikanë, pothuajse dy muaj pasi Presidenti Nicolas Maduro u kap nga forcat amerikane.

“Ligji mbi bashkëjetesën demokratike është miratuar. I është përcjellë presidentes në detyrë Delcy Rodriguez për ratifikim”, tha presidenti i këtij organi, Jorge Rodriguez, ndërsa njoftimi u prit me brohoritje nga ligjvënësit.

Hartimi i ligjit u njoftua nga presidentja në detyrë Delcy Rodriguez, e cila pasoi Nicolas Maduron pasi u kap nga ushtria amerikane në një operacion në Caras në fillim të vitit.

Kush përjashtohet nga amnistia?

Legjislacioni nuk i mbulon individët që “inkurajuan” veprime të armatosura kundër vendit, një dispozitë që mund të përjashtonte anëtarët e opozitës, përfshirë udhëheqësen e saj dhe laureaten e Çmimit Nobel për Paqen, Maria Corina Machado, e cila kishte mbështetur sulmin ushtarak amerikan më 3 janar.

Sipas Nenit 9, ata që nxitën, kërkuan, inkurajuan, lehtësuan, financuan ose morën pjesë në veprime të armatosura ose të dhunshme kundër popullit, sovranitetit kombëtar dhe integritetit territorial të Venezuelës nga shtete, kompani ose individë jashtë vendit janë të përjashtuar.

Miratimi i ligjit çoi në përfundimin e një greve urie nga të afërmit e të burgosurve politikë që mbaheshin në qendrën e paraburgimit Zona 7 në Karakas. Dhjetë gra kishin filluar një grevë urie që nga e shtuna, duke ngritur kampe jashtë burgut dhe duke kërkuar lirimin e të afërmve të tyre.

Meqenëse ato përjetuan probleme shëndetësore, nëntë prej tyre e ndaluan protestën të mërkurën në mbrëmje. E dhjeta vazhdoi deri të enjten, kur ajo i dha fund grevës pas “136 orësh”, ose më shumë se pesë ditësh.