Pas Francës edhe Britania mbështet njohjen e shtetit palesinez, por pa afat kohor

Ministri britanik i teknologjisw, Peter Kyle, deklaroi se Mbretëria e Bashkuar mbetet e përkushtuar për të njohur shtetin palestinez, megjithatë nuk dha një afat konkret për këtë hap. Ai theksoi se çdo shpallje e shtetësisë duhet të jetë “e zbatueshme në momentin e shpalljes” dhe e lidhur me një proces që sjell paqe dhe stabilitet të qëndrueshëm në rajon.

Deklarata e ministrit vjen vetëm një ditë pas njoftimit të Francës se do ta njohë zyrtarisht shtetin e Palestinës në muajin shtator.

I ftuar në emisionin “BBC Breakfast”, Kyle u pyet nëse Mbretëria e Bashkuar do të ndjekë shembullin francez. Ai u përgjigj se prioriteti aktual i qeverisë është emergjenca humanitare në Gaza dhe nevoja për të siguruar ndihma të menjëhershme për popullsinë civile.

“Fokusi ynë është që të vendosim ushqim në pjatat e njerëzve. Po kërkojmë një armëpushim, dhe më pas do të bëjmë gjithçka që mundemi nga pozita e një mbështetësi për rajonin, për të krijuar kushtet që do të çojnë drejt negociatave për shtetësinë e Palestinës dhe sigurinë që i duhet rajonit,” deklaroi ministri.

Ai shtoi se kryeministri britanik do të zhvillojë një takim me liderët e Francës dhe Gjermanisë për të diskutuar situatën në Lindjen e Mesme dhe hapat e mëtejshëm për një zgjidhje afatgjatë.

“Është një angazhim i kësaj qeverie, i përfshirë në manifestin tonë, që duam të ndihmojmë në krijimin e shtetësisë për Palestinën,” theksoi Kyle.

“Kjo duhet të ndodhë në një mënyrë që fuqizon popullin palestinez dhe kontribuon për paqe e stabilitet,”- shtoi ai.

Kjo deklaratë vjen në një kohë kur mbështetja globale për njohjen e shtetit palestinez është në rritje, pas zhvillimeve të fundit dramatike në Rripin e Gazës dhe përpjekjeve për një armëpushim të qëndrueshëm.

LEXONI GJITHASHTU:

• Britania dhe 24 shtete të tjera dënojnë vrasjen e qindra banorëve në Gaza
• Po kërkonin ndihmë në Gaza, forcat izraelite vrasin 67 palestinezë