Pasardhësja e Angela Merkel, të Gjelbrit prezantojnë kandidaten Annalena Baerbock

Në Gjermani, Annalena Baerbock do të jetë kandidatja e të Gjelbërve për kancelare. Partia e bëri njoftimin ditën e hënë, pas disa javë diskutimesh të brendshme mes Baerbock dhe bashkëkryetarit Robert Habeck.

Kjo është hera e parë që të Gjelbërit kandidojnë për kancelar. Lëvizja e tyre shënon fillimin e një kapitulli të ri për partinë, tha Baerbock, dhe nëse gjërat shkojnë mirë, ashtu do të shkojnë edhe për Gjermaninë.

Ajo u shpreh e bindur se vendit i duhet një fillim i ri, ku mbrojtja nga ndryshimet e klimës të jetë çështja kryesore.

“E ardhmja nuk është diçka që vjen rastësisht. Ajo është në duart tona dhe prandaj unë jam këtu sot. Kemi dëgjuar në vitet e fundit të flitet për gjëra që s’mund të arrihen. Por, ajo që ka rëndësi tani janë gjërat që mund të arrihen. Unë jam për një fillim të ri, të tjerët për status quo”, u shpreh Annalena Baerbock, kandidate për kancelare, Gjermani.

Baerbock duhet të konfirmohet zyrtarisht në konferencën federale të të Gjelbërve në qershor. Aprovimi i saj konsiderohet i sigurt. Kjo e bën Baerbock gruan e dytë në Gjermani pas Angela Merkel që kandidon për postin më të lartë qeveritar.

Gjermania mban zgjedhjet për Bundestagun më 26 shtator. Të Gjelbrit renditen lart në sondazhe dhe llogariten si partia e dytë më e fortë pas koalicionit CDU/CSU.