Pekini mbyll metrotë për të parandaluar përhapjen e COVID-19

Pekini ka mbyllur rreth 10 për qind të stacioneve të metrosë, si masë kundër përhapjes së COVID-19.

Autoritetet e metrosë bënë me dije se vendimi për mbylljen e 40 stacioneve hyn në fuqi më 4 maj, teksa nuk u dha ndonjë datë se kur do të rihapen.

Metrotë kryesisht gjenden në qendër të qytetit, dhe mbyllja e tyre është në kuadër të masave për kontrollin e pandemisë.

Pekini ka ndërmarrë një sërë masash kundër COVID-19. Baret dhe restorantet lejohet vetëm të japin ushqim me vete. Palestrat janë mbyllur dhe shkollat po ashtu. Shumica e qendrave turistike në Pekin, përfshirë edhe Kopshtin Zoologjik, janë mbyllur.

Qytetarëve të Pekinit u kërkohet që t’iu nënshtrohen tri testeve brenda javës, pasi autoritetet po tentojnë që të zbulojnë dhe izolojnë rastet me koronavirus.

Të mërkurën, Pekini ka regjistruar 51 raste me koronavirus, pesë prej të cilave ishin asimptomatike.

Përderisa masat kundër pandemisë në Pekin konsiderohen më të buta, Kina ka aplikuar një politikë strike kundër koronavirusit, duke vendosur kufizime në udhëtime, duke urdhëruar testimin e qyteteve të tëra dhe duke ngritur ndërtesa për izolimin e personave të infektuar.

Së fundmi, Shangai është përballur me rritje të rasteve me koronavirus. Ky qytet, që ka 26 milionë banorë, ka raportuar 4,982 raste të mërkurën dhe 16 vdekje.

LEXONI GJITHASHU:

• Italia kërkon vendosjen e maskave në trena, kinema dhe ambientet sportive
• Nuk duam të shohim luftë bërthamore, thotë ambasadori kinez në Shqipëri