Shërbimet e urgjencës në Australi urdhëruan mijëra qytetarë në Sidnej që të evakuohen gjatë ditës së hënë pasi lumenjtë e tejmbushur përmbytën një pjesë të tokës dhe rrezikohej diga më e madhe.
Rreth 32.000 njerëz ishin nën urdhra evakuimi ose paralajmërime në Uellsin e Ri Jugor, tha Ashley Sullivan, zyrtar i lartë për Shërbimet Shtetërore të Emergjencave.
Prej tre ditësh bregu lindor australian është përfshirë nga shira rrëmbyeshëm.
Ekipet e shpëtimit kanë shpëtuar rreth 20 njerëz në 12 orët e fundit, shumë prej tyre ishin të bllokuar në makina pasi rrugët janë përmbytur.
Për shkak të përmbytjeve, jo vetëm rrugët, por edhe shumë banesa janë mbuluar nga uji.
Në shumë zona rrezik janë edhe digat, ku nivelet e ujit kanë arritur pikat maksimale.
Australia së fundi është prekur nga pasojat e ndryshimeve klimatike, me thatësira, zjarre vdekjeprurëse, dëborë dhe përmbytje fenomene që janë bërë më të zakonshme ndërsa modelet globale të motit ndryshojnë.
Temperatura më të larta do të thotë se atmosfera mban më shumë lagështi, duke shkaktuar më shumë reshje shiu çka sjell më pas edhe përmbytje.
LEXONI GJITHASHTU:
