Përmbytjet lënë mbi 327 mijë njerëz pa energji elektrike në Rusi, shpallet gjendja e jashtëzakonshme

Autoritetet në kryeqytetin e rajonit jugor rus të Dagestanit shpallën gjendje të jashtëzakonshme të shtunën, pasi reshjet e dendura të shiut çuan në përmbytje të mëdha të vendit dhe ndërprerje të energjisë elektrike në rajon.

“Shërbimet e emergjencës janë vënë në gatishmëri të lartë, po bëhen përpjekje për t’u përballur me pasojat dhe do t’u ofrohet ndihmë banorëve të prekur”, tha administrata e qytetit të Makhachkalasë në Telegram.

Më shumë se 327,000 njerëz mbeten pa energji elektrike në Dagestan për shkak të motit të keq, tha ministria rajonale e situatave të emergjencës.

“Që nga ora 12:00, 283 vendbanime me një popullsi prej 327,183 banorësh, përfshirë 89,705 fëmijë, mbeten pa energji elektrike”, tha ministria në faqen e saj të internetit.

Kreu i rajonit, Sergei Melikov, tha se shërbimet e emergjencës dhe zyrtarët ishin përgatitur për përkeqësimin e kushteve të motit, por situata aktuale “i tejkaloi edhe parashikimet më pesimiste”.

Ndërkohë, zyrtarët në qytetin e dytë më të madh të Dagestanit, Khasavyurt, thanë se një urë hekurudhore ishte dëmtuar për shkak të reshjeve të rrëmbyeshme të shiut.

“Dy pjesë të urës u shembën në seksionin Khasavyurt-Kadiyurt të Hekurudhës së Kaukazit të Veriut”, tha shërbimi për shtyp i qeverisë së Dagestanit.

Sipas parashikimeve, reshjet e dendura të shiut në rajon pritet të vazhdojnë deri të dielën.