Përmbytjet në Francë e Itali: Macron paralajmëron se rindërtimi mund të zgjasë disa muaj

Emmanuel Macron ka paralajmëruar banorët e fshatrave të përmbytur në Francë se mund të duhen disa muaj për të rindërtuar shtëpitë e tyre, teksa u zotua për akordimin e një fondi prej 100 milionë eurosh.  

Presidenti francez vizitoi disa zona në Alpe, të shkatërruara plotësisht nga përmbytjet ku humbën jetën dhe të paktën 13 persona, prej të cilëve 5 në Francë dhe 8 në Itali, ndërkohë që rreth 20 të tjerë janë ende në kërkim.  

Duke folur nga Breil-sur-Roya, një fshat me 2 mijë banorë që është shndërruar në gërmadhë, Macron duartrokiti “kurajën” dhe “solidariteti” e ekipeve të kërkim-shpëtimit si dhe banorëve të zonës, duke iu premtuar se do të dërgonte më shumë ndihma.

Ndihmat përfshijnë dhe një fond prej 100 milionë eurosh, përveç financimeve nga BE dhe autoriteteve vendore.

Deklarata e  tij vjen pas imazheve që qarkullojnë së fundmi ku tregohet dëmet e jashtëzakonshme të shkaktuara nga përmbytjet gjatë javës, me shtëpi, rrugë dhe ura të shkatërruara.

Disa banorë të Tende, një fshat në kufirin me Italinë, i thanë Macron se “kanë humbur gjithçka” dhe se janë të “shqetësuar për të ardhmen e tyre”.

Një grua e përlotur iu drejtuar presidentit duke i kërkuar “që të mos t’i harrojnë” dhe se “kanë nevojë për ndihmë”.

Helikopterët po shpërndajnë ndihma si dhe ushqime për banorët e zonës.

Përmbytjet kanë dëmtuar rëndë zonën e Alpeve franceze dhe pjesën veriperëndimore të Italisë, Ligurian dhe Pjemonten.

Lexoni gjithashtu: 

12 viktima dhe dhjetëra të humbur nga përmbytjet në Francë dhe Itali

Stuhia “Alex” godet Francën e Italinë, erë dhe shira të rrëmbyeshëm, dy viktima dhe 25 persona të zhdukur