Përpjekjet e fundit për presidencën, 11 senatorë pro Trump refuzojnë të certifikojnë fitoren e Joe Biden

Një grup prej njëmbëdhjetë senatorësh shpallën të shtunën se kanë formuar një koalicion për të sfiduar rezultatin e zgjedhjeve presidenciale duke refuzuar disa prej elektorëve fitues në disa shtete, teksa Kongresi do të mblidhet javën e ardhshme për të certifikuar rezultatin e Kolegjit Elektoral.

Përpjekjet e jashtëzakonshme të presidentit amerikan Donald Trump për të mos pranuar humbjen në zgjedhje janë kthyer në një pikë mosmarrëveshjeje në partinë republikane.

Lideri i shumicës në Senat, Mitch McConnell, u bëri thirrje republikanëve që të mos përmbysin rezultatin e zgjedhjeve.

Njëmbëdhjetë senatorët, nën drejtimin e Ted Cruz nga Teksas, thanë se do të votojnë kundër elektorëve shtetëror në rast se Kongresi nuk krijon një audit të posaçëm për të hetuar rezultatin e zgjedhjeve, megjithatë duke pranuar se kjo nuk ka të ngjarë të ndryshojë rezultatin.

Si kundërpërgjigje ndaj pretendimeve të Trump për mashtrim elektoral, zyrtarë të zgjedhjeve dhe ish-Prokurori i Përgjithshëm, William Barr, janë shprehur se nuk ka “prova që mbështesin këto pretendime”.  

Inaugurimi i Joe Biden si presidenti i Shteteve të Bashkuara do të mbahet më 20 janar, pas fitores me 306-232 vota në Kolegjin Elektoral.

Trump, presidenti i parë që nuk fiton një mandat të dytë në thuajse 30 vite, thotë se shkaku i humbjes së tij ishte manipulimi i zgjedhjeve, megjithatë ka një konsensus të gjerë në mesin e zyrtarëve elektoralë se zgjedhjet u zhvilluan në mënyrë të rregullt. 

Lexoni gjithashtu:

• Republikanët ‘rrëzojnë’ Trump, Kongresi hedh poshtë veton e presidentit ndaj projektligjit për mbrojtjen
• Nga COVID-19 te vrasja e Floyd dhe zgjedhjet e 3 nëntorit, vit i trazuar në SHBA