Përplasja për borxhin publik, qeveria synon ta ulë në 60% gjatë mandatit, FMN: Nuk zbret nën 70%  

Shqipëria ka sot nivelin më të lartë të borxhit publik në rajon dhe ndër më të lartit në Europë.

Pandemia, kriza ekonomike, por edhe programi i rindërtimit pas tërmetit e detyruan qeverinë të rriste ndjeshëm huamarrjen vitin e kaluar, duke e rritur borxhin me 10 pikë përqindje krahasuar me vitin 2019.

Për ministrinë e Financave, borxhi publik ka arritur në 76% të PBB-së, ndërsa për Bankën Qendrore dhe FMN-në ai arrin në 80% të PBB-së. Përkundër qeverisë, këto institucione llogarisin edhe detyrimet e prapambetura që shteti ka ndaj të tretëve.

Në deklaratën e fundit të Fondit Monetar, borxhi i përgjithshëm i qeverisë parashikohet të jetë 80% e PBB-së, në fund të vitit 2021. Më tej FMN sugjeron se ai do të bjerë gradualisht duke filluar nga viti 2024, pasi masat mbështetëse dhe rindërtimi të përfundojnë.

Në programin qeverisës të këtij mandati, synohet që borxhi publik të ulet në 60% në fund të mandatit, por Fondi Monetar e sheh tepër ambicioz këtë synim, duke deklaruar se ai do të mbetet mbi normën 70% të PBB-së gjatë qeverisjes Rama 3.

Madje, me krizën aktuale energjitike dhe kërkesës për të marrë 500 milion euro borxh përmes eurobondit, ndërhyrjet e qeverisë për uljen e borxhit do të jenë edhe më të vështira.

LEXONI GJITHASHTU: 

• Qeveria po fsheh borxhin për të shtyrë krizën financiare, thotë ish-ministri
• ‘Premtimet për uljen e borxhit, taksave dhe rritjen e rrogave s’janë realiste’, thotë ish-zv. ministri në qeverinë Rama 2
• Ministrja e Financave: Borxhi publik deri në fund të vitit mund të shkojë në 80%