Franca dhe Greqia kanë nënshkruar një marrëveshje ushtarake, sipas së cilës Franca do të duhet të ndërhyjë në rast të një sulmi mbi Greqinë.

Kjo marrëveshjes mes presidentit Francës dhe kryeministrit grek ka shkaktuar pakënaqësi jo vetëm në radhët e Turqisë, por dhe më gjerë.

Në emisionin “Eurotalks”, prof. Dr. Ferdinant Gjana u shpreh për këtë çështje se është një histori e gjatë konfliktesh, zanafilla e të cilave vjen që nga “pavarësia e Greqisë nga Perandoria Osmane”.

Ndërsa, drejtori i televizioni “Tribuna”,  Robert Goro, tha në “Eurotalks” se Athina zyrtare e kishte të domosdoshëm nënshkrimin e një pakti të ri strategjik dhe ushtarak me Francën për shkak të tensioneve Greqi-Turqi, që vitet e fundi kanë shkuar në rritje, por edhe për shkak të një “disekuilibri të theksuar sa u përket arsenaleve ushtarake ndërmjet Turqisë dhe Greqisë”.

Nëpërmjet kësaj marrëveshjeje, z. Goro tha se Greqia përmbush dy synime, që janë modernizimi i forcave të armatosura të ushtrisë greke si edhe ndihmon në krijimin e një lloj balancimi të diferencës së madhe në arsenalin ushtarak ndërmjet Greqisë dhe Turqisë.

Artan Kutra, gazetar i “Radio France International” tha për “Eurotalks” se Franca e nënshkroi këtë marrëveshje me Greqinë, pasi synimi i saj është që të ruajë stabilitetin në Mesdhe dhe sidomos në Mesdheun Lindor, gjë që e theksoi edhe vetë presidenti i Francës, Emmanuel Macron.