Përplasjet për zgjedhjet lokale, Manjani tregon dy pyetjet që duhet t’u japë përgjigje Kushtetuesja

Gjykata Kushtetues ka caktuar 23 qershorin si datë për zhvillimin e seancës ku do të shqyrtojë vlefshmërinë e zgjedhjeve lokale të 2019.

Ish-ministri i Drejtësisë, Ylli Manjani i pranishëm në studion e “Ilva Now” në Euronews Albania shpalosi dy pyetjet, të cilat sipas tij do duhet të marrin përgjigje nga ana e Gjykatës Kushtetuese.

“Dy pyetje themelore ka Gjykata Kushtetuese për të zgjidhur.  E para; mbahen apo jo zgjedhjet pa një datë në kuptimin formal të fjalës? Dhe e dyta: A mundet Presidenti i Republikës të ndryshojë datën e zgjedhjeve, qoftë edhe për një arsye të interesit publik? Këto janë dy pyetje që duhet t’u përgjigjet Kushtetuese me datë 23 qershor”, tha ai.

Ai theksoi se kjo çështja ka interpretime të shumta, ndërsa u shpreh se nëse Gjykata arrin në përfundimin se nuk mund të mbahen zgjedhjet pa një datë, ajo duhet të konstatojë pavlefshmëri të zgjedhjeve.

“Nëse gjykata arrin në përfundimin se zgjedhjet nuk mbahen pa një datë të caktuar me dekret në fuqi, duhet të konstatojë pavlefshmëri të zgjedhjeve”, shtoi Manjani.

Më tej z. Manjani theksoi se një vendimi i vlefshëm i Gjykatë Kushtetuese, quhet atëherë kur çështja merr minimalisht pesë vota pro.

“Që të jetë vendimi i vlefshëm duhet që pesë anëtarë duhet të votojnë pro një alternative, ky është thelbi i ligjit. Në çdo rast duhet të jenë pro, prandaj janë nëntë anëtarë. Shumica e nëntëshes”, tha ai.

Pasi përfundoi procesi zgjedhor i 2019, kryetarja e Bashkisë Shkodër Voltana Ademi në emër të bashkive të Shqipërisë, një shoqatë e drejtuar prej vetë asaj, vendosi të çojë çështjen në Gjykatën Kushtetuese, duke i kërkuar asaj të shpallë pavlefshmëri dhe përsëritje të zgjedhjeve.