Përurohet ”Rrjedha Ballkanike”, vihet në funksion gazsjellësi rus që kalon përmes Serbisë

Në ditën e parë të vitit 2021, Presidenti i Serbisë Aleksandar Vuçiç njoftoi vënien në funksion të një pjesë të tubacionit kryesor të gazsjellësit të ri 403 kilometra që sjell gazin rus nga Bullgaria nëpërmjet Serbisë drejt kufirit hungarez.

Ky tubacion quhet “Rrjedha ballkanike” dhe është degë e gazsjellësit gjigand, “Rrjedha Turke”, një investim i përbashkët i kompanisë ruse Gazprom me kompaninë turke “Botash”.

Sipas presidentit serb, vendi i tij do të marrë gaz me një çmim deri në 155 dollarë për metër kub dhe kostot e transportit janë shumë më të ulëta, deri ne 14 dollarë, nga 48 që kushtonte më parë. Sipas presidentit Vuçiç, gjëja më e rëndësishme është, se ky gazsjellës do të krijojë një mjedis shumë tërheqës për investuesit e huaj, pasi do të ketë burime energjie shumë të lira.

Presidenti serb premtoi një ulje të konsiderueshme të çmimit të gazit për ngrohje për familjet serbe. Gazsjellësi “Rrjedha Turke” është në total është i gjatë 930 kilometra me një kapacitet prej 31.5 miliardë metra kub gaz në vit.

Dega e parë kalon nëpër Turqi, ndërsa dega e dytë shkon në Bullgari, Serbi, Hungari dhe vende të tjera të Evropës Qendrore. Kapaciteti i secilit krah është 15.75 miliardë metra kub gaz. 

Kjo sasi energjie është e mjaftueshme për të përmbushur nevojat e 15 milionë familjeve të mesme. Gazsjellësi “Rrjedha turke” është pjesë e ambicies afatgjate të Rusisë që ta çuar në minimum transportin e gazit përmes Ukrainës, me ndërtimin e kaheve alternative, siç janë, përveç “Rrjedhës turke”, edhe “Rrjedha veriore 1” dhe “Rrjedha veriore 2”.

Bashkimi Evropian nuk e mbështet ketë projekt. Ndërtimi i gazsjellësit të ri fuqizon pozitën monopoliste të “Gazpromit” në tregun e gazit të Serbisë, së paku për 20 vjetët e ardhshëm.