Pjesëmarrje e ulët në zgjedhjet rajonale në Francë

Presidenti francez, Emmanuel Macron dhe udhëheqësja e ekstremit të djathtë, Marine Le Pen nuk arritën të bindin votuesit në zgjedhjet rajonale, të cilat u karakterizuan nga një pjesëmarrje e ulët.

Qytetarët francezë duket se kanë zgjedhur të shijojnë kohën e mirë sesa të shkojnë të votojnë.

Pjesëmarrja ishte një nga më të ulëtat në zgjedhjet franceze në histori, me vetëm 26.7%, nga 43% në vitin 2015 dhe 39.3% në vitin 2010. Sondazhet parashikuan një normë abstenimi prej 68%.

Votimi i së dielës po konsiderohet si një parathënie e zgjedhjeve presidenciale të vitit të ardhshëm, ku Macron dhe Le Pen pritet që të luftojnë në raundin e dytë.

Votuesit zgjedhin këshilltarë për 13 rajonet e Francës, si dhe për 96 departamente. Partitë që fituan më shumë se 10% të votave në raundin e parë mund të kalojnë në balotazhin vendimtar më 27 qershor.

Kampi i Macron e ka përshkruar abstenimin rekord, si një “shuplakë demokratike”.

Ndërsa, udhëheqësja e ekstremit të djathtë u bëri thirrje votuesve të shkojnë në votime për raundin e dytë që do të mbahet dielën që vjen.

Njerëzit që shkuan në votime thanë se rritja e mundshme e ekstremit të djathtë duhet të kundërshtohet.

LEXONI GJITHASHTU:

• Zgjedhjet rajonale në Francë test për Macron, sondazhet nxjerrin favoritë ekstremistët e Le Pen
• Në Francë hapen parqet dhe hiqet maska, në Austri ‘festë’ nga 1 korriku
• Gazetari Burimi tregon se s’ka karantinë për shqiptarët që duan të udhëtojnë në Francë