Plani ‘Qyteti 30’, në rrugët e Schaerbeek shpejtësia maksimale e lejuar është 30km/orë

Nga 1 janari 2021, plani “Qyteti 30” do të zbatohet në rrugët e Schaerbeek, çka do të thotë se shpejtësia maksimale e lejuar në rajonin e Brukselit do të jetë 30 km/orë, me disa përjashtime për të ashtuquajturat akse strukturuese. Qytetarët janë të ndarë në mendime sa i përket këtij plani.

“Është më mirë sepse makinat do të lëvizin më ngadalë, e po ashtu është diçka pozitive për sigurinë e fëmijëve”, thotë një qytetare.

“Jam dakord që të funksionojë para shkollave, por në vendet e tjera me duket e tepërt”, shprehet një qytetar,

Kryebashkiakja e Schaerbeek shprehet se siguria në rrugë mbetet një sfidë e rëndësishme.

“Ka ende njerëz të pabindur që nuk duan të kuptojnë se siguria rrugore është një sfidë shumë e rëndësishme. Kjo masë ka pasur efekt jo vetëm në uljen e numrit të aksidenteve, për dy vjet ne nuk kemi pasur asnjë aksident të rëndë, dhe tani ka edhe disa zona më të qeta”, thotë Cécile Jodogne, kryebashkiakja e Schaerbeek. 

Që nga viti 2018, zona e Schaerbeek ka testuar kufirin e shpejtësisë prej 30 km në të gjitha rrugët e saj. Lidhur me aksidentet, sipas policisë belge, ka një rënie prej 12 % vetëm për periudhën 2019/2020.