Polonia në “luftë” me COVID-19 gjatë fundjavës së Pashkëve, shtohen shtrimet në spitale

Spitalet në Poloni ishin ‘në luftë’ pas një rritje të rasteve të koronavirusit.

Rreth 40,000 raste u konfirmuan gjatë dy javëve përpara fundjavës së Pashkëve, duke çuar në një fluks të madh të pacientëve me COVID-19, mes një rritje të infeksioneve në të gjithë Evropën Qendrore dhe Lindore.

Ka pasur raporte në mediat polake rreth sektorit shëndetësor që arrin një pikë kritike dhe në disa spitale pothuajse të gjitha shtretërit janë mbushur nga pacientë me koronavirus.

Një spital i tillë është spitali i qarkut të Bochnia-s, rreth 40 kilometra në lindje të qytetit jugor të Krakov, i cili të 120 shtretërit e tij i kishte të zënë nga pacientët me COVID të dielën e Pashkëve.

Një nga pacientët, Edward Szumanski shprehu shqetësime rreth asaj se si disa ende nuk pranojnë ta shohin virusin si një kërcënim.

“Sëmundja është sigurisht atje dhe është shumë serioze. Ata që nuk e kanë kaluar atë, ata që nuk e kanë atë në familjen e tyre, mund të mashtrojnë vetveten, por realiteti është i ndryshëm”, u shpreh ai.

Ai tha se ishte i shqetësuar se hapësirat spitalore mund të mbaronin së shpejti dhe se më shumë njerëz do të vdisnin.

Ndërkohë drejtori mjekësor i spitalit, Jaroslaw Gucwa, tha se pandemia ishte përkeqësuar nga ata që besojnë se e gjitha është një mashtrim.

Kufizime të reja, më të ashpra për pandeminë u urdhëruan në Poloni për një periudhë dy-javore përreth Pashkëve në mënyrë që të ngadalësohej shkalla e infeksionit.

Qëllimi ishte që të parandalohen tubimet e mëdha gjatë fundjavës tre-ditore, duke kulmuar me të hënën e Pashkëve.

Polonia ka gati 2.5 milionë raste të konfirmuara që nga fillimi i pandemisë dhe pothuajse 55,000 vdekje.

Lexoni gjithashtu:

Rihapen dyqanet e vogla në Greqi, vijojnë kufizimet në udhëtimet ndërkombëtare

Vijon vaksinimi në Evropë, qytetarët në radhë për të marrë dozën, autoritetet përshpejtojnë procesin