Pompeo në Greqi, apel Athinës dhe Ankarasë që të ulen në tryezën e bisedimeve

Sekretari amerikan i Shtetit, Mike Pompeo i bëri thirrje Greqisë dhe Turqisë, aleate në NATO, që të nisin sa më parë bisedimet në lidhje me çështjen e kufijve detarë.

Athina dhe Ankaraja kanë rënë dakord për të rifilluar bisedimet mbi zonat e kontestuara detare në lindje të Mesdheut, pas javësh të tëra tensionesh, por nuk kanë njoftuar ende një datë për mbajtjen e tyre.

“Ne mbështesin fuqishëm dialogun mes aleatëve në NATO, Greqisë dhe Turqisë dhe i inkurajojmë ato që të rifillojnë diskutimet sa më shpejt të jetë e mundur. Fola me sekretarin e përgjithshëm të Aleancës, Jens Stoltenberg dy ditë më parë mbi progresin që është bërë në këtë drejtim dhe shpresojmë që dialogu të jetë serioz”, është shprehur Pomepo.

Deklaratën e tij, Pompeo e bëri në një konferencë shtypi me kryeministrin grek Kyriakos Mitsotakis, në bazën ushtarake Souda, në ishullin e Kretës. Nga ana e tij, Mitsotakis ka nënvizuar se bisedimet duhet të bazohen tek ligji ndërkombëtar.

“Ligji ndërkombëtar duhet të jetë busulla jonë. Sekretari Pompeo është i vetëdijshëm për gatishmërinë tonë për të zhvilluar bisedime, të cilat do të nisin së shpejti, paralelisht me procedurat teknike që po zhvillohen në kuadër të NATO-s. Jam optimist se koha për diplomaci është ajo e duhura”, thotë kryeministri Grek, Mitsotakis.

Tensionet mes Athinës dhe Ankarasë arritën kulmin muajin e kaluar kur pala turke dërgoi anijen “Oruç Reis” në ujërat e kontestuara, të shoqëruara nga luftanije, për të kryer kërkime për naftë dhe gaz.

Pak kohë më vonë, Turqia e tërhoqi anijen në mënyrë që t’i jepte një shans diplomacisë, përpara samitit të 1 dhe 2 tetorit të BE, që do të diskutojë vendosjen e mundshme të sanksioneve ndaj saj.

Lexoni gjithashtu:

“Një shans diplomacisë”, Erdogan: Ja pse e tërhoqëm anijen

Përplasje për detin, Rama e Bakoyannis replika për “ndërhyrjen” turke në vitin 2009