Pompeo në Romë, paralajmëron Italinë për rrezikun nga Kina

Sekretari amerikan i Shtetit, Majk Pompeo deklaroi të mërkurën nga Roma se ishte i shqetësuar për planet e Kinës për të zgjeruar influencën e saj ekonomike në Itali.

Shtetet e Bashkuara i kanë bërë vazhdimisht thirrje Italisë, ku ndodhen baza të shumta ushtarake amerikane, të mos i thellojë marrëdhëniet me Pekinin.

Në konferencën për shtyp me ministrin e Jashtëm Luixhi Di Maio, Pompeo tha se Kinës nuk i intereson një marrëveshje e sinqertë tregtare.

Ai i bëri thirrje Romës zyrtare të marrë parasysh rreziqet që i kanosen sigurisë kombëtare dhe privatësisë së qytetarëve të saj nga kompanitë teknologjike të lidhura me qeverinë kineze.

Nga ana tjetër, shefi i diplomacisë italiane, Di Maio, deklaroi se Italia do të vijojë t’u përmbahet zotimeve në kuadër të partneritetit me Perëndimin dhe shtoi se i kupton shqetësimet e Shteteve të Bashkuara.