Premier League në “zjarr”: Arsenal kryeson, Guardiola i irrituar para Realit

Premier League vazhdon me ritëm të lartë, me Arsenal e drejtuar nga Mikel Arteta që mban kreun e tabelës dhe synon titullin e parë që nga sezoni 2003-04. Nga ana tjetër, Manchester City i Pep Guardiola renditet i dyti, pesë pikë prapa, por me një ndeshje më pak, duke synuar trofeun e shtatë në nëntë sezonet e fundit.

Sot, në raundin e 29-të, Arsenali udhëton në transfertë ndaj Brighton & Hove Albion, ndërsa City pret në shtëpi Nottingham Forest (20:30). Dueli në distancë Arteta–Guardiola vijon të mbajë gjallë garën për titull.

Guardiola përballet me dilema sa i takon formacionit. Ai konfirmoi se Erling Haaland është “shumë më mirë” pas dëmtimit që e la jashtë në fitoren 1-0 ndaj Leeds United, ndërsa në dyshim mbetet edhe Nico O’Reilly.

Tekniku spanjoll nuk e fshehu irritimin me kalendarin e ngjeshur para përballjes me Real Madrid në Ligën e Kampionëve. Me ironi, ai falënderoi Federatën Angleze për kohën e reduktuar të rikuperimit, pas caktimit të ndeshjes ndaj Newcastle United në Kupën FA në orar të vonë. Një situatë e ngjashme u përsërit edhe me zhvendosjen e sfidës ndaj West Ham United, duke i lënë “qytetarët” me vetëm 72 orë në dispozicion para ndeshjes së kthimit me madrilenët.

Ndërkohë, në kampin kundërshtar nuk mungojnë “thumbimet”. Trajneri i Brighton, Fabian Hürzeler, kritikoi Arsenalin për vonesat në ekzekutimin e goditjeve të këndit. “Ndonjëherë u duhet më shumë se një minutë për të ekzekutuar një goditje këndi”, deklaroi ai.

“Topçinjtë” barazuan rekordin e Premier League për më shumë gola të shënuar direkt nga goditjet e këndit në një sezon (16), ndërsa Arteta u shpreh i zhgënjyer që skuadra e tij nuk kishte realizuar edhe më shumë nga këto situata.

Gara për titull mbetet e hapur, me çdo javë që mund të rezultojë vendimtare në një sezon që premton spektakël deri në fund.