Presidenti amerikan mesazh ndjekësve në Twitter pas shtrimit në spital nga COVID-19

Presidenti amerikan Donald Trump u transferua në një spital ushtarak për t’u mjekuar, pasi u diagnostikua me COVID-19.

Thuajse 17 orë pasi ai njoftoi se kishte rezultuar pozitiv me coronavirus, Trump doli me ngadalë nga Shtëpia e Bardhë dhe eci drejt një helikopteri që po e priste për ta çuar në qendrën spitalore kombëtare Walter Reed, në Merilend.

Ai mbante veshur një maskë dhe këtë herë nuk u foli gazetarëve. Megjithatë, pak orë më vonë ai reagoi përmes një postimi në Twitter, ku thoshte se ishte në gjendje të mirë.

“Mendoj se po shkoj mirë. Ju faleminderit të gjithëve. Ju dua”, shkroi Trump në profilin e tij.

Në ditët e ardhshme presidenti i Shteteve të Bashkuara do të punojë nga një suitë speciale e spitalit, bëri të ditur zëdhënësja e Shtëpisë së Bardhë.

Sipas një burimi në dijeni të çështjes, Trump ka pak temperaturë. Ndërsa mjeku i Shtëpisë së Bardhë, Sean Conley tha se 74-vjeçari po trajtohet me një seri ilaçesh eksperimentale dhe se është i lodhur, por në humor të mirë.

Lexoni gjithashtu:

I prekur nga COVID-19, Donald Trump transportohet në spital

Infektimi i Trump me COVID-19, reagon Joe Biden

Ambasadë në Jerusalem? Rama ‘refuzon’ Trump: Shumë respekt për Izraelin, por Shqipëria do të ndjekë vijën e BE