Probleme në funksionimin e Starlink-ut, ndërprerje e shkurtër edhe në Ukrainë

Shërbimi satelitor i internetit Starlink, i kompanisë SpaceX të Elon Muskut, ka përjetuar një ndërprerje të shkurtër të hënën në mëngjes, duke ndikuar edhe në Ukrainë, ku ushtria përdor lidhjet e tij për komunikimin në vijën e frontit.

Në një njoftim zyrtar, kompania theksoi se “Starlink aktualisht po përjeton ndërprerje të shërbimit. Ekipi ynë po heton”, pa dhënë hollësi të tjera mbi shkakun apo afatin e rikthimit të shërbimit.

Komandanti i forcave ukrainase për dronë bëri të ditur se “Starlink u fik përgjatë tërë vijës së frontit në orën 07:28 sipas kohës së Ukrainës (06:28 sipas kohës qendrore evropiane)” dhe shtoi se në orën 08:02 shërbimi filloi të rikthehej gradualisht.

Portali që monitoron ndërprerjet e internetit, Downdetector, raportoi se mbi 43 mijë përdorues në Shtetet e Bashkuara kishin hasur probleme me Starlink gjatë kësaj periudhe.

Starlink, i menaxhuar nga SpaceX, ofron shërbime interneti përmes një konstelacioni satelitor në orbitën e ulët të Tokës dhe përdoret gjerësisht në zona të largëta, si dhe rajone të konflikteve në mbarë botën, duke ofruar një lidhje thelbësore për komunikim në kushtet më të vështira.