Protesta në aeroportet e Francës, punonjësit kundër shkurtimit të pagave

Udhëtarët nuk patën probleme apo vonesa, ndonëse një grevë kundër shkurtimeve të pagave ka nisur prej tri ditësh nga punonjësit e grupit Aéroports de Paris (ADP), i cili drejton aeroportet e Parisit, “Charles de Gaulle” dhe “Orly”.

Mëngjesin e kësaj të shtune, rreth njëqind punonjës marshuan në një nga terminalet e “Charles De Gaulle” nën tingujt e një bande muzikore. Me ta u bashkuan edhe njëqind protestues të tjerë.

Disa prej demonstruesve u gjobitën me 135 euro nga policia për “pengimin e funksionimit të aeroportit” dhe “praninë e pajustifikuar në aeroport”.

“Kompania e aeroporteve të Parisit mund të blejë 1.6 miliardë aeroporte në të gjithë botën, por nuk dëshiron të na paguajë pagat tona. Ky është një mashtrim”, shprehet një protestues.

Tri sindikata po bëjnë thirrje që aksioni të vazhdojë deri të hënën për të siguruar tërheqjen nga plani për të përshtatur kontratat e punës (PACT), i cili parashikon një ulje të pagave ose eliminim të shpërblimeve. Nëse refuzojnë të nënshkruajnë, punonjësit rrezikojnë të pushohen nga puna.

Radhë të mëdha pasagjerësh mund të shiheshin gjatë kontrollit, pasi udhëtarët u paralajmëruan të vinin herët në mënyrë që të mos kishte vonesa për shkak të protestës, pasi kjo është periudha që përkon edhe me nisjen e sezonit të pushimeve. Por duket se pas një kohe të gjatë izolimi për shkak të COVID, asgjë nuk e turbullon dëshirën për të udhëtuar.

LEXONI GJITHASHTU:

• Greva e punonjësve të ‘Albcontrol’, kontrollorët e rajonit kërkesë autoriteteve shqiptare: Uluni në dialog
• Greva prej 24 orësh e doganës greke, radhë kilometrike me kamionë në Kakavijë