Protesta në Turqi, studentët kundër Erdogan

Policia turke u përlesh ditën e hënë me studentët që protestuan kundër emërimit të rektorit të ri të një prej universiteteve kryesore të vendit nga presidenti Recep Tayyip Erdogan, duke e quajtur procesin jodemokratik.

Me një dekret të publikuar të shtunën, Erdogan caktoi Melih Bulu, me doktoratë në menaxhim biznesi, si rektor të Universitetit të Bogaziçi të Stambollit.

Lëvizja çoi në protestën e studentëve dhe akademikëve, të cilët përmes parullave kërkuan dorëheqjen e rektorit të ri.

Ata brohorisnin duke thënë se nuk dëshironin një rektor të caktuar nga shteti.

Disa studentë, që arritën të hynin në kampus, bllokuan një nga godinat e universitetit. Më vonë, forcat e policisë përdorën topa uji për të shpërndarë manifestuesit.

Melih Bulu, që sipas mediave turke kandidoi për deputet me partinë e Erdogan në vitin 2015, është rektori i parë që zgjidhet nga jashtë universitetit që nga grushti ushtarak i shtetit në Turqi, në vitin 1980.