Protesta për klimën, në Francë më shumë presion mbi ligjvënësit për projektligjin e ri

Dhjetëra mijëra njerëz u mblodhën në qytete anembanë Francës për të shprehur kundërshtimin e tyre ndaj asaj që ata e kanë quajtur “pseudo” projekt-ligji që po shqyrtohet në parlament, një projektligj mbi mjedisin.

Në Paris dhe Lion protestat ishin më masive.

Protestuesit u thirrën nga organizatat jofitimprurëse dhe sindikatat, të cilat argumentojnë se ligji i ri i Francës për ndryshimin e klimës nuk do ta ndihmojë vendin të përmbushë qëllimet minimale të emetimeve të Bashkimit Evropian.

“Ekziston një urgjencë e vërtetë,  një kërkesë nga qytetarët që ndryshimi të nis tani. Dhe ne kemi përshtypjen se të gjithë organet demokratike kanë humbur fuqinë e tyre dhe se rruga mbetet një nga bastionet e fundit për të shprehur veten si qytetarë, u shpreh një qytetare.

Projekt-ligji aktual propozon uljen e emetimeve të karbonit me 40 përqind deri në 2030.

Por, Marrëveshja e Gjelbër Evropiane synon që BE si një e tërë të ulë emetimet e saj të karbonit me 55 përqind.

Ligjvënësit francezë do të fillojnë të shqyrtojnë projekt-ligjin dhe organizatorët kanë bërë thirrje që nëse ligji miratohet të vijojnë protestat.