Protestuesit përplasen me policinë në Bolivi, kërkojnë dorëheqjen e presidentit! Shkak kriza ekonomike

Mijëra minatorë bllokuan qendrën e kryeqytetit bolivian La Paz të enjten dhe u përleshën me policinë gjatë një demonstrate që kërkonte dorëheqjen e presidentit, Rodrigo Paz. Këto demonstrate kanë ardhur për shkak të një krize ekonomike në vend.

Minatorët me helmeta mbërritën pas një marshimi nga qyteti fqinj i El Altos dhe u zhvendosën drejt selisë së qeverisë, duke bërtitur: “Dorëheqje”.

Kur iu afruan selisë së qeverisë, ata u përfshinë në incidente me forcat e sigurisë, duke përdorur pajisje shpërthyese, ndërsa policia nga ana tjetër përdori gaz lotsjellës dhe mjete të tjera.

Minatorët thonë se industria e tyre ka nevojë për një furnizim të qëndrueshëm me karburant, zona të zgjeruara minerare dhe eksplozivë, por qeveria e qendrës së djathtë nën Presidentin Paz, në pushtet që nga nëntori, po bën një vesh të shurdhër.

Përveç punëtorëve të minierave, qeveria është përballur me një valë mobilizimesh masive të punëtorëve në sektorë të tjerë: punëtorët, fermerët, mësuesit dhe punëtorët e transportit që po paraqesin kërkesa, nga rritja e pagave deri te stabilizimi i ekonomisë, përfshirë anulimin e privatizimeve të ndërmarrjeve shtetërore.

Bolivia po përjeton krizën e saj më të rëndë ekonomike në katër dekada. Inflacioni arriti në 14% në prill në bazë vjetore.