Punëtorët e Amazon në Alabama votojnë kundër formimit të sindikatës së parë në kompani

Punëtorët e kompanisë Amazon në Alabama i dhanë gjigantit të shitjeve online një fitore vendimtare, kur votuan kundër formimit të sindikatës së parë brenda ndërmarrjes.

Pas muajsh të tërë fushate agresive nga të dyja palët, 53% e thuajse 6 mijë punëtorëve hodhën votën në kuti, me 1.798 punëtorë që refuzuan sindikatën, ndërsa 738 votuan pro saj.

 “Njerëzit nuk duhet të mendojnë se rezultatet e këtij votimi bëjnë të vlefshme kushtet e punës së Amazon dhe mënyrën se si ajo trajton punonjësit. Përkundrazi. Rezultatet tregojnë ndikimin e fuqishëm të frikësimit të punëdhënësit dhe ndërhyrjet e tij”, tha Stuard Appelbaum, përfaqësues i punëtorëve pro-sindikatës së Amazon.

Mbështetësit e sindikatës deklaruan se kompania kishte ndërhyrë ilegalisht në votim, duke keq informuar punëtorët në takimet e tyre. Por të tjerë mendojnë ndryshe.

“Unë e di sa janë rrogat në çdo nivel të menaxhimit të kompanisë, ato dihen publikisht, ndaj mendova se krijimi i një sindikate ishte diçka e panevojshme”, shprehet Lavonette Stokes, punonjëse e Amazon.

Krijimi i një sindikate ishte përpjekja më e madhe e punëtorëve të Amazon në historinë 26-vjeçare të kompanisë, si dhe hera e dytë që në radhët e tyre organizohej një votim.

Magazina në Besmer kishte kohë që ishte në qendër të diskutimeve duke qenë se ishte sipërmarrja e dytë më e madhe në Alabama, një shtet me ligje refraktare ndaj sindikatave.