Putin: Armatosja e NATO-s nuk është kërcënim për Rusinë

Presidenti rus, Vladimir Putin, deklaroi se përpjekja e NATO-s për të rritur shpenzimet për mbrojtje nuk përbën kërcënim për Rusinë.

Kjo u shpreh gjatë një konference për media më 18 qershor, vetëm disa ditë para një samiti të rëndësishëm të aleancës në Hagë, ku pritet të miratohet një plan për forcimin e kapaciteteve ushtarake në Evropë.

Putin tha se Rusia nuk sheh rritjen e shpenzimeve ushtarake nga NATO-ja si kërcënim, pasi vendi i tij është në gjendje të garantojë vetë sigurinë e tij, duke vazhduar modernizimin e forcave të armatosura. Megjithatë, ai pranoi se një rritje e tillë mund të sjellë sfida “të veçanta” për Moskën, për të cilat Rusia do t’i përgjigjet me masa të përshtatshme.

Në konferencë, Putin po ashtu u shpreh se trupat ruse do të vazhdojnë avancimin në Ukrainë, duke theksuar se Rusia ka “avantazh strategjik” në fushëbetejë. Ai deklaroi se forcat e tij po avancojnë gradualisht përgjatë vijës së kontaktit dhe nuk do të ndalen.

Në të njëjtën kohë, ai përpiqej të minonte autoritetin e presidentit ukrainas, Volodymyr Zelensky, ndërsa Kievi kërkon garanci sigurie nga NATO-ja si pjesë e çdo marrëveshjeje për ndalimin e luftës.

Samiti i NATO-s në Hagë do të diskutojë edhe për kërkesën e presidentit amerikan Donald Trump që anëtarët të rrisin shpenzimet për mbrojtje në 5 për qind të Bruto Produktit të Brendshëm. Konflikti në Ukrainë vazhdon të mbetet një nga temat më të nxehta në axhendën ndërkombëtare, ndërsa tensionet midis Rusisë dhe Perëndimit thellohen.

LEXONI GJITHASHTU:

• “Do t’ua kërkojmë çmimin..”, Netanyahu dhe Presidenti izraelit dënojnë ashpër sulmet
• Ministri izraelit: Sulmi i Iranit ndaj spitalit është kriminal