Putin para gazetarëve: Akuzat për helmimin e Navalny, marifet, Sputnik-V efektive

Presidenti i Rusisë, Vladimir Putin, ne kulmin e pandemisë, ka zhvilluar një konferencë virtuale para gazetarëve për të bërë një përmbledhje të vitit që po lëmë pas.

Argumentet e tij kanë nisur me procesin e vaksinimit, ku kreu i Kremlinit u shpreh se ende nuk e ka marrë vaksinën ruse Sputnik-V, ndërsa i bëri thirrje qytetarëve që të vaksinohen.

“Vaksina duhet të krijojë një imunitet të përgjithshëm mbarëkombëtar. Më lejoni ta them përsëri se vaksina jonë është efektive dhe e sigurt. Prandaj nuk shoh asnjë arsye për të mos u vaksinuar,” – u shpreh presidenti i Rusisë Vladimir Putin.

Ai gjithashtu shtoi se Rusisë do t’i duhet kohë për të rritur kapacitetin për prodhimin e vaksinave.

Duke u ndalur tek ekonomia Presidenti rus tha se një rritje e nivelit të varfërisë së Rusisë me më shumë se 13% ishte shumë e lartë, teksa nënvizoi se ky nivel duhet të bjerë në 6.5% deri në vitin 2030.

Putin është përgjigjur edhe për çështjen e liderit opozitar Aleksei Navalny, i cili pak muaj më parë u helmua me agjentin kimik novicok e ku ndërkombëtarët kërkojnë sqarime nga Moska e cila deri tani vazhdon të mohojë çdo përfshirje.

Presidenti rus është shprehur se akuzat nga bashkëshortja e Navalny-t janë thjesht një “marifet” për të sulmuar zyrtarët e lartë të Rusisë.

Gjithashtu, tha se kundërshtari i tij nuk ishte mjaftueshëm i rëndësishëm për t’u shënjestruar, pasi “nëse dikush do të donte ta helmonte Navalnin, do ta kishte mbaruar tashmë këtë punë”.

Sa i përket raporteve me Shtetet e Bashkuara të Amerikës, Putin u shpreh se shpreson që zgjedhja e Joe Biden si president do të përmirësojë marrëdhëniet dypaleshe.

Gjithashtu, mohoi çdo përzierje të hakerëve rusë për të ndihmuar Donald Trump të fitonte vota në zgjedhjet presidenciale të vitit 2016.