Putin shpall javën e mospunës në Rusi, si masë kundër COVID-19

Presidenti i Rusisë, Vladimir Putin mbështeti planin e kabinetit të tij për të shpallur javën e mospunës në Rusi, si masë për frenimin e përhapjes së COVID-19.

Ai tha se rajonet e Rusisë me situatë më të rëndë mund ta nisin këtë javë nga 23 tetori dhe shtoi se ajo mund të zgjatet, varësisht nga situata, ndërsa ky plan pritet të implementohet për pjesën tjetër të vendit nga data 30 tetor.

Të mërkurën, autoritetet shëndetësore ruse raportuan për 1,028 viktima nga COVID-19 – shifra më e lartë në Rusi prej se ka nisur pandemia.

“Tani për tani, është e rëndësishme që të zvogëlohet kulmi i valës së re të pandemisë”, tha Putin.

Ai shtoi se punëtorët duhet të paguhen për periudhën që nuk punojnë.

Rusia ka numrin më të lartë të viktimave nga COVID-19 në Europë (226,353) dhe të katërtin më të lartë në botë, pas Shteteve të Bashkuara, Brazilit dhe Indisë.

Një ditë më herët, ky vendi regjistroi 34,074 raste të reja të të infektuarve.

Vetëm 35 për qind apo një e treta e popullsisë së Rusisë është vaksinuar plotësisht.