Pyjet Atlantike të Brazilit shënojnë shpyllëzimin më të ulët në 40 vjet

Pyjet Atlantike të Brazilit, bioma më e kërcënuar e vendit, vitin e kaluar regjistruan nivelin më të ulët të shpyllëzimit që nga fillimi i monitorimit 40 vjet më parë.

Pylli është bioma më e populluar e Brazilit dhe shtëpia e 80% të popullsisë dhe qyteteve të mëdha si Rio de Janeiro dhe Sao Paulo. Në vitin 2025, ai regjistroi 8,658 hektarë shpyllëzim, duke shënuar herën e parë që ka rënë nën 10,000 hektarë që nga viti 1985.

Ambientalistët i kanë mirëpritur rezultatet, të cilat sipas tyre mund të çojnë edhe në “shpyllëzim zero” në pyllin e Atlantikut brenda vetëm pak vitesh, por paralajmëruan për rreziqe të mundshme që mund të përmbysin trendin në rënie të viteve të fundit.

Njëra është miratimi i fundit në kongresin e Brazilit i të ashtuquajturit “projektligj për shkatërrimin”, i cili dobëson në mënyrë drastike ligjin mjedisor.

Tjetra është perspektiva e një qeverie të ekstremit të djathtë, kundër politikave të mbrojtjes së mjedisit, që kthehet në pushtet në zgjedhjet presidenciale të tetorit.

“Është një skenar shumë shqetësues”, tha Luis Fernando Guedes Pinto, drejtor ekzekutiv i OJQ-së SOS Mata Atlantica i cili shtoi se me një fitore për Bolsonaronon, Brazili mund të humbasë mundësinë për të qenë një lider global mjedisor.

Një studim, i kryer gjatë katër dekadave, tregoi një rënie prej 40% të shpyllëzimit nga viti 2024 në vitin 2025, duke rënë nga 14,366 në 8,658 hektarë. Nën presidencën e Bolsonaros, ajo tejkaloi 20,000 hektarë në secilin prej dy viteve të tij të fundit në detyrë.

Të dhënat e tjera treguan një rënie prej 28%, nga 53,303 në 38,385 hektarë. Ky monitorim është kryer vetëm që nga viti 2022, dhe shifra e vitit të kaluar ishte më e ulëta.

Dallimi midis dy sistemeve të monitorimit, sipas OJQ-së, rrjedh nga satelitët që përdorin – sistemi më i ri është më i saktë, ndërsa ai më i vjetri ofron një të dhënë historike më të gjatë.

Bioma është e treta më e madhe në vend, pas Amazonës dhe savanës Cerrado, por është padyshim më e urbanizuara dhe më e degraduar. Pyjet e Atlantikut tani kanë vetëm 24% të mbulesës së tyre origjinale pyjore, ndërsa Amazona ruan rreth 80% dhe Cerrado rreth 50%.