Italia kriminalizon festat pa leje, 6 vjet burg kush mbledh mbi 50 vetë

Kryeministrja e re e Italisë, Giorgia Meloni ka deklaruar se qeveria e saj do ta bëjë vepër penale mbajtjen e festave pa leje.

Krimi në fjalë parashikon dënimin me 6 vjet burg të kujt organizon grumbullime me mbi 50 persona. Gjithashtu, ajo i hap rrugë mundësisë së përgjimit telefonik të organizatorëve.

Reagimi i qeverisë së djathtë erdhi pas ndalimit të një feste të tillë në qytetin e Modenës, ku ishin mbledhur rreth 1 mijë persona.

Banorët e zonës ishin ankuar se për 48 orë kishin dëgjuar pa ndalim muzikë tekno. Festa, e mbajtur natën e Halloween-it, tërhoqi shumë të rinj.

Ata kishin planifikuar të qëndronin më gjatë, por u larguan pa bërë rezistencë pas ndërhyrjes së policisë.

Kryeministrja Meloni argumentoi se ligji i ri synon të mbrojë njerëzit nga lëndimet dhe konsumi i drogërave.

Ajo theksoi se ligji nuk është ndryshe nga ai i vendeve të tjera të Evropës, por do të tregojë se shteti italian do të jetë i pranishëm për zbatimin e tij.

Përfaqësuesi i opozitës, Enrico Letta deklaroi se një ligj i tillë vë në diskutim lirinë e qytetarëve dhe të drejtën e tyre për të protestuar.

Por zëvendës kryeministri Matteo Salvini replikoi duke thënë se, nuk ka kthim pas. “Festa mbaroi”, deklaroi Salvini.

LEXONI GJITHASHTU:

• ‘Kurrë me fashizmin’, Meloni në Parlament: Italia, partner i besueshëm i Perëndimit
• Italia në prag të formimit të qeverisë me gjithë debatet për ‘miqësinë’ me Putin