Qeveria ruse: Qytetarët s’kanë të drejtë të organizojnë protesta pa leje

Qeveria ruse ka thënë se njerëzit që janë kundër pushtimit të Ukrainës nuk kanë të drejtë të organizojnë protesta në Rusi pa kërkuar më parë leje.

“Sipas ligjit, pa ndjekur procedurat e duhura, këta qytetarë nuk kanë të drejtë të organizojnë aksione proteste për të shprehur këndvështrimin e tyre”, tha zëdhënësi i Kremlinit, Dmitry Peskov gjatë një konference me gazetarë të huaj.

Qindra protestues u arrestuan nga policia të enjten gjatë demonstratave kundër luftës.

Sipas ligjit rus, demonstratat e mëdha kërkojnë që protestuesit të aplikojnë për një leje, e cila duhet të dorëzohet jo më shumë se 15 por jo më pak se 10 ditë përpara ngjarjes. Gjoba të rënda dhe në disa raste edhe burg mund të vendosen për ata që protestojnë pa leje.