Qeveria shtyn me një muaj afatet e tenderit për koncesionin e rrugës Milot-Fier

Ministria e Infrastrukturës dhe Energjisë shtyu me një muaj afatet e tenderit për koncesionin e rrugës Milot-Fier me arsyen se pandemia e COVID-19 u ka vështirësuar kompanive “përgatitjen dhe dorëzimin e të gjithë dokumenteve të kërkuara”.

Tenderi për dhënien me koncesion të projektimit, ndërtimit dhe menaxhimit për 35 vite të rreth 115 kilometra rrugë nga Miloti në Fier u hap më 9 korrik dhe kishte si afat përfundimtar datën 28 shtator.

Me një “shtojcë” në procedurë, ministria e ka shtyrë afatin e dorëzimit dhe hapjes së ofertave për më 28 tetor.

“[…] duke vlerësuar situatën tepër të vështirë nga gjendja epidemiologjike, gjë e cila ka ndikuar në mënyrë të drejtpërdrejtë në veprimtarinë e subjekteve tregtare dhe më gjerë, si dhe nisur nga kërkesa e operatorëve të ndryshëm për vështirësitë e hasura në përgatitjen si dhe dorëzimin e dokumenteve të kërkuara, dhe si rrjedhim me kërkesën për më tepër kohë në hartimin dhe plotësimin e tyre, vlerësohet nevoja e shtyrjes së afatit…” – thuhet në shtojcën e ministrisë (lexo këtu dokumentin e plotë).

Qeveria e prezantoi koncesionin e rrugës Milot-Fier si projekt kryesor, pjesë të të ashtuquajturit “Korridori Adriatiko-Jonian”, i cili do të nxisë më tepër lëvizjet tregtare dhe turistike. Punimet thuhej se do të nisnin brenda vitit të ardhshëm dhe përfundimi i plotë i segmenteve do të mbyllej brenda 5 vitesh.

Segmentet e rrugës Milot-Fier janë:

• Milot – Thumanë, 13.5 kilometra
• Thumanë – Kashar, 20 kilometra
• Kashar – Pezë Helmes, 9 kilometra
• Pezë Helmes – Luz i Vogël, 24 kilometra
• Luz i Vogël – Lekaj – Rrogozhinë, 8 kilometra
• Rrogozhinë – Bypass i Fierit, 38 kilometra

Koncesioni është parashikuar të jetë për 35 vite. Ai parashikohet të ketë kosto prej rreth 1.2 miliardë euro me nënkalimi dhe mbikalime, gardhe sigurie, rrugë hyrje-daljeje, zona parkimi dhe monitorimi. Shpejtësia e lejuar parashikohet të jetë nga 90 deri në 130 kilometra në orë.

Operimi i rrugës nga koncesionari do të jetë me pagesë rreth 7.5 euro. Kjo dhe kostoja e lartë prej 1.2 miliardë eurosh nxiti opozitën të akuzonte qeverinë për aferë korruptive dhe abuzim me paratë publike në kurriz të qytetarëve.

Ministrja e Infrastrukturës, Belinda Balluku hodhi poshtë pretendimet duke këmbëngulur se koncesionari do të ndërtojë edhe rrugë dytësore, qasja në të cilat do të jetë pa pagesë.

Lexoni gjithashtu:

Qeveria hap garën, rruga Milot-Fier me koncesion, do të kushtojë €1.2 miliardë dhe do të jetë me pagesë

PD akuza për korrupsion qeverisë: Rruga Milot-Fier koncesion fantazmë, tenderi 5 ditë pa u shpallur

Rruga Milot-Fier, Bozdo: Kostoja për km, sa 10-fishi i Bypass-it. 1,2 mld euro në xhepat e koncesionarit

Rruga Milot-Fier, Balluku hedh poshtë pretendimet e opozitës për kosto të fryra