Raportet BE-Turqi, zyrtarë të lartë të unionit takohen me Erdogan

Bashkimi Evropian dhe Turqia janë të gatshme për të diskutuar adresimin e dallimeve mes tyre. Ka qenë ky përfundimi i vizitës së presidentit të Këshillit të BE, Charles Michel dhe presidentes së Komisionit Evropian, Ursula von der Leyen në Ankara.

Pas takimit me presidentin Recep Tayyip Erdogan, Michel dhe Von der Leyen kanë deklaruar se mirëpresin qasjen e moderuar të Turqisë në lidhje me kërkimet në lindje të Mesdheut, por kanë theksuar se vendi duhet të bëjë më shumë për sundimin e ligjit dhe garantimin e të drejtave të njeriut.

Në këtë drejtim, krerët e bllokut evropian kanë shprehur shqetësimin për tërheqjen e Turqisë nga konventa për mbrojtjen e grave. Sidoqoftë, ata janë shprehur të gatshëm për tejkalimin e diferencave.