Raportet Kosovë-Slloveni do të thellohen në të ardhmen, thotë Osmani

Presidentja e Kosovës, Vjosa Osmani ka zhvilluar këtë të hënë një vizitë zyrtare në kryeqytetin e Sllovenisë, Ljubjanë, ku është pritur me nderime të larta shtetërore nga homologu slloven Borut Pahor.

Osmani ka deklaruar se marrëdhëniet e afërta ndërmjet popujve të Kosovës dhe Sllovenisë, datojnë që nga vitet e para luftës dhe janë zhvilluar hovshëm në vitet që pasuan.

Sipas saj, raportet ndërshtetërore me Slloveninë do të thellohen dhe intensifikohen vazhdimisht në të ardhmen.

“Kosova dhe Sllovenia ndajnë të njëjtin vizion për paqe e prosperitet në rajon bazuar në vlerat euro-atlantike. Anëtarësimi në BE dhe NATO janë garanci kryesore për paqe në rajonin tonë. Mirënjohës pafund për mbështetjen e Sllovenisë për të ardhmen tonë evropiane, përfshirë për përkrahjen për liberalizimin e vizave dhe anëtarësimin e Kosovës në Këshillin e Evropës”, u shpreh ajo.

Sipas presidentes, ekziston gatishmëria e dyanshme që të punohet për hapjen e kapitujve të rinj të bashkëpunimit në fushën ekonomike, atë të mbrojtjes e në diplomaci, si dhe në shumë fusha të tjera.

LEXONI GJITHASHTU

• Mishi dhe qumështi s’mund të sillen në Kroaci prej udhëtarëve nga Kosova
• Po punojmë për mësimin e gjuhës shqipe në diasporë, thotë Kurti