Raporti mbi festat e paligjshme ‘fshikullon’ Johnson

Raporti mbi festat e kryeministrit Boris Johnson të mbajtura gjatë kufizimeve anti-COVID konstatoi një dështim të lidershipit të tij në zbatimin e rregullave.

Hetimi, i realizuar nga zyrtarja e shërbimit civil Sue Gray, thotë se disa nga grumbullimet e kabinetit të Johnson vështirë se mund të justifikohen.

Raporti citon përdorimin e tepruar të alkoolit dhe thotë se, të paktën disa nga festat në fjalë përbënin një dështim në plotësimin e standardeve që priten nga personat që punojnë në zemër të qeverisë britanike e që qytetarët presin të respektohen.

Përmbajtja e raportit është megjithatë e kufizuar për shkak të një kërkese të Policisë Metropolitane të Londrës, e cila po zhvillon një hetim paralel.

Vetë Johnson kërkoi falje në një fjalim në Parlamentin britanik, i mbajtur pak orë pas publikimit të raportit.

“Së pari dua të them se më vjen keq. Më vjen keq për gjërat që nuk i bëmë si duhet dhe për mënyrën se si kjo çështje është menaxhuar. Është e kotë të thuash se kjo apo ajo ndodhi ishte brenda rregullave, apo se njerëzit që u përfshinë në to punojnë shumë. Kjo pandemi ishte e vështirë për të gjithë. Ne u kërkuam njerëzve në vend të bënin një sërë sakrificash të jashtëzakonshme; të mos takonin të dashurit e tyre, apo të mos vizitonin të afërmit para se ata të vdisnin. Ndaj, unë e kuptoj zemërimin e tyre”, u shpreh Johnson.

Fjalimi i Johnson u kontestua nga ligjvënësit e opozitës, të cilët disa herë kanë kërkuar që ai të japë dorëheqjen.

LEXONI GJITHASHTU:

• Boris Johnson dhe festat e papërshtatshme
• Boris Johnson në shënjestër të karikaturistëve