Reduktim i dozave të vaksinës, 6 shtete evropiane kërkojnë nga BE transparencë dhe stabilitet

Kur thuajse në të gjitha shtetet evropiane ka nisur procesi i vaksinimit me vaksinën Pfizer dhe Moderna, në horizont shfaqen të tjera probleme sa i përket shpërndarjes së dozave.

Disa vende të BE po marrin me pak doza të vaksinës Pfizer, pasi firma amerikane ka reduktuar përkohësisht dërgesat.

Gjashtë shtete e quajtën situatën “të papranueshme” dhe paralajmëruan se po “ulet besueshmëria e procesit të vaksinimit”.

Suedia, Danimarka, Finlanda, Lituania, Letonia dhe Estonia i kërkuan BE të ushtrojë presion mbi kompaninë Pfizer-BioNTech.

Në një letër drejtuar komisionit Evropian gjashtë ministrat e Shëndetësisë i bën thirrje Bruksleit të sigurojë transparencë dhe stabilitet.

Presidentja e Komisionit të BE, Ursula von der Leyen tha se ajo ishte siguruar nga shefi ekzekutiv i Pfizer se të gjitha porositë e garantuara për shpërndarjen në tremujorin e parë të vitit do të mbërrinin.

Ndërsa vetë kompania në një komunikim për mediat bëri me se dërgesat e reduktuara ishin një çështje e përkohshme.

“Edhe pse kjo do të ndikojë përkohësisht në dërgesat në fund të janarit deri në fillim të shkurtit, kompania do të sigurojë një rritje të konsiderueshme në doza të disponueshme për pacientët në fund të shkurtit dhe marsit,”  bëri me dije Pfizer.

Brukseli ka blerë rreth 2 miliardë doza vaksinash nga kompani të shumta për përdorim në 27 vendet anëtare.

Kontrata me Pfizer/BioNtech është për 600 milionë doza, gjysma e të cilave pritej të dorëzoheshin para shtatorit.

Megjithatë, Komisioni nuk mbikëqyr shpërndarjen e dozave në vendet anëtare dhe secili vend është gjithashtu përgjegjës për strategjinë e tij të vaksinimit.

Danimarka ka inokuluar pjesën më të lartë të qytetarëve.

Irlanda dhe Italia vijnë më pas me më shumë se 1,600 doza për 100,000 banorë.

Në vendet e BE ka nisur të shpërndahet edhe vaksina e Moderna, ndërsa ajo e prodhuar nga AstraZeneca ka kërkuara aprovimin tek Agjencia Evropiane e Barnave.

Lexoni gjithashtu:

Efektet anësore të vaksinës, 23 persona humbin jetën në Norvegji, ndryshon strategjia e vaksinimit

Mbi 2 mln viktima nga COVID-19, “Pfizer” vonon shpërndarjen e vaksinave në BE